Peqqinnissakkut sullissinernik ussassaarisarneq pillugu Inatsisartut peqqussutaat nr. 8, 31. maj 2001-imeersoq.

 

Kalaallit Nunaanni peqqinnissaqarfik pillugu inatsimmi nr. 369-imi, 6. juni 1991-imeersumi § 1 aamma § 3 naapertorlugit makku aalajangersarneqarput:

 

Atuuffia

§ 1. Inatsisartut peqqussutaanni peqqinnissaqarfimmi suliassat peqqissaasutut sulinissamut akuerisaasut akuerisaanngitsullu taakkuluunniit sinnerlugit sullissisunit ingerlanneqartut pillugit ussassaarisarneq, matumani tusagassiorfitsigut nalunaaruteqarnerit ilanngullugit, pineqarput. Inatsisartut peqqussutaanni, allatut aalajangiisoqarsimatinnagu, napparsimmavinnut, pisortat peqqinnissakkut suliffeqarfiutaannut allanut, peqqinnissakkullu sullissivinnut namminersortunut, peqqissaasunullu namminersortunut kiisalu atorfeqarfinnut peqqinnissakkut sullissivinnut allanut tunngatillugu ussassaarisarneq pillugu ataatsimut malittarisassat aalajangersarneqarput.
Imm. 2. Atuagassiatigut nalunaaruteqartarnermut atatillugu taamaallaat innuttaasunut kajumissaarinertaqanngitsumik paasissutissiinerit pineqarput.
Imm. 3. Inatsisartut peqqussutaanni isarussanik isinullu igalaasartaasanik ikkuttakkanik ussassaarinerit pineqanngillat.
Imm. 4. Inatsisartut peqqussutaanni peqqinnissakkut sullissineq pillugu pisortani oqartussaasut paasissutissiisarnerat pineqanngilaq.
Imm. 5. Naalakkersuisut sullissivii imm. 1-imi pineqartut saniatigut sullissivinnut allanut peqqussutip tamakkiisumik ilaannakortumilluunniit atuunnissaa pillugu aalajangersagaliorsinnaapput.

§ 2. Inatsisartut peqqussutaannissaaq suliffiup ussassaarinermi pineqartup Kalaallit Nunaata avataani suliaqarnissaanik siunertalimmik Kalaallit Nunaanni ussassaarutinik saqqummiisarneq pineqarpoq.

 

Ussassaarutit pillugit malittarisassat

§ 3. Peqqinnissakkut sullissineq pillugu ussassaarineq suliamut tunngassuteqartuinnarnik, eqqortumik uppernassuseqartunik tamakkiisumillu imaqassaaq.
Imm. 2. Atuagassiatigut nalunaarutit taamaallaat imarissavaat peqqissaasup aqqa, suliffiup taaguutaa ilanngunneqarsinnaavoq, peqqissaasup sulinermini taaguutaa, najugaa, oqarasuaataata faxiatalu normui, e-mailikkut nassitsivissaq, qaqugu naapinneqarsinnaasoq, tassani ilanngullugit piffissat sulifimminiittanngiffii, suiaassusia qassinillu ukioqarnera, immikkut ilisimasalittut akuerisaanera, suliffiup innarluutilinnit tikikkuminartuunera, misissuisarfiup innarluutilinnut atortulersugaanera il. il. aammattaaq misissuisarfimmut atasumik innarluutillit biiliinut unittarfeqarnersoq il. il., kiisalu misissuinermi katsorsaanermilu periaatsit, utaqqisunut piffissaliussat qanorlu akeqartitsineq
Imm. 3. Tusagassiorfitsigut nalunaaruteqarneq fjernsynikkut ingerlanneqassanngilaq.

§ 4. § 3, imm. 2-mi aalajangersakkami peqatigiiffiit kattuffiillu innuttaasunut nalinginnaasumik peqqinnissamut tunngasunik paasissutissiisarneri pineqanngillat.
Imm. 2. Atuagassiatigut nalunaarutit peqqinnissaqarfimmi suliassaqarfiup iluani sulisunut nalunaarutaat § 3, imm. 2-mi aalajangersakkami pineqanngillat.

 

Nakkutilliineq

§ 5. Peqqinnissaqarfimmik Nakkutillisoqarfik Inatsisartut peqqussutaat manna malillugu ussassaaruteqartarnermik nakkutilliisuuvoq.
Imm. 2. Peqqinnissaqarfimmik Nakkutilliisoqarfik nakkutilliinermut atatillugu suliaq pillugu isummaminik saqqummiussisinnaavoq imaluunniit § 6, imm. 1 malillugu pineqaatissiisoqarnissaa siunertaralugu sulissuteqarluni aallartitsisinnaalluni.
Imm. 3. Naalakkersuisut peqqussut manna malillugu ussassaarisarneq pillugu erseqqinnerusunik malittarisassaliorsinnaapput, matumani § 3, imm. 1 aamma 2 kiisalu § 4, imm. 1 aamma 2 ilanngullugit.

 

Pineqaatissiissuteqartarneq

§ 6. § 3-mi aalajangersakkamik unioqqutitsinermi akiliisitaasussanngortitsilluni eqqartuussisoqarsinnaavoq.
Imm. 2. Maleruaqqusani peqqussut manna tunngavigalugu pilersinneqartuni aalajangersakkanik unioqqutitsinermi akiliisitaasussanngortitsilluni eqqartuussaasoqarsinnaanera aalajangersarneqarsinnaavoq.
Imm. 3. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik assigisaaluunniit unioqqutitsippat ingerlatseqatigiiffik akiliisitaasussanngorlugu eqqartuunneqarsinnaavoq.

 

Atuutilersitsineq

§ 7. Inatsisartut peqqussutaat atuutilissaaq ulloq 1. august 2001.
Imm. 2. Nakorsat sulinerat pillugu inatsisip Kalaallit Nunaannut atuutilersinneqarnera pillugu peqqussummi nr. 860-imi, 18. december 1991-imeersumi § 21, imm. 1 aamma § 26, imm. 2 atorunnaarput.
Imm. 3. Kigutit nakorsaat pillugit inatsimmi nr. 276-imi, 26. maj 19976-imeersumi § 16 atorunnaarpoq.
Imm. 4. Kigusiortut kigutilerisinnaasut pillugit inatsimmi nr. 100-mi, 14. marts 1979-imeersumi § 10 atorunnaarpoq.

Namminersornerullutik Oqartussat, ulloq 31. maj 2001

Jonathan Motzfeldt

/

Alfred Jakobsen